Pujol: Barcelona-Mançester Junajted, gjysmëfinalja më e mirë në histori të "Champions"-it

Kapiteni i Barcelonës, Karlos Pujol, ka pohuar se gjysmëfinalja e Ligës së Kampionëve ndërmjet Barcelonës dhe Mançester Junajtedit, ndoshta do të jetë ndeshja më e madhe në histori.
"Jam i sigurt se nëse Mançester Junajtedi do të vazhdojë të luajë kështu edhe vitin e ardhshëm, do ta fitojë Ligën e Kampionëve, por sivjet nuk do t'ia arrijë këtij qëllimi", ka theksuar Pujol. Në këtë sfidë do të jenë yjet si Kristiano Ronaldo, Uejn Runi e Karlos Tevez në njërën anë dhe Tieri Anri, Lionel Mesi e Samuel Eto në anën tjetër. "Kjo do të jetë gjysmëfinalja më e mirë në historinë e Ligës së Kampionëve. E respektojmë shumë Mançester Junajtedin, ngase është klub i madh me lojtarë fantastikë. Pres dy ndeshje të shkëlqyeshme, por në fund jam i bindur se do të jemi ne ata që do të udhëtojmë në Moskë", ka nënvizuar Pujol. "Kristiano Ronaldo është një lojtar fantastik. Është artaktiv në fushën e lojës dhe shënon shumë gola. Ai mund ta vendos vetë ndeshjen. Por, edhe ne kemi lojtarë të shkëlqyeshëm, kurse për këto dy sfida në fushë do të kthehet edhe Lionel Mesi, i cili shumë i rëndësishëm për skuadrën tonë", ka përfunduar Pujol.